El Gobiernu central cede los terrenos de la fábrica de La Vega al Conceyu d'Uviéu

Falta por afitar la tasación que va ser estudiada polos técnicos

El Conceyu d'Uviéu y el Ministeriu de Defensa cerraron güei'l protocolu pa la recuperación de los terrenos de La Vega, el pasu previu a la firma del conveniu pol qu'Uviéu va recibir l'antigua fábrica d'armes en cuenta de una compensación urbanística, y que l'equipu de Gobiernu espera cerrar primero qu'acabe la llexislatura.

Amás d'esti protocolu, dambes partes alcordaron una concesión demanial pa qu'Uviéu puea utilizar cuanto enantes la capiya y el claustru, los dos bienes d'interés cultural del espaciu.

L'actual rexidor celebró esti pasu alantre nun proyectu "vital" pa Uviéu y p'Asturies, y que supón l'apertura a la recuperación de los terrenos de La Vega pa la ciudadanía uvieína. Sobre'l protocolu, afirmó que ta "zarráu", a falta del trámite formal de la so firma, que podría llevase alantre nun mes.

D'equí p'alantre, van ser los técnicos de dambes alministraciones los que van tener que trabayar y poner les propuestes sobre la mesa pa llegar a un alcuerdu que quede formalizáu nel conveniu que reflexe la devolución de los terrenos.

Pela so parte, el secretariu d'Estáu de Defensa, Ángel Olivares, resaltó'l deséu del Gobiernu central de qu'esti espaciu "tan importante" vuelva tar al serviciu d'Uviéu y d'Asturies. Afondó en que, nel tiempu que dure esti procesu, l'Alministración central va siguir facilitando l'usu de los terrenos cuando les necesidaes cultural y social de la ciudá asina lo demanden.