El Gobiernu comprométese a llanzar esti semestre les ayudes polos incendios de 2023

L'Executivu destaca que los presupuestos recueyen una medría del 43% pa polítiques forestales

El Gobiernu asturianu comprometióse esti miércoles a llanzar esti semestre la convocatoria d’ayudes directes pa salvar les pérdides forestales causaes polos incendios qu’arrasaron los conceyos de Tinéu y Valdés ente’l 29 de marzu y el 9 d’abril de 2023, una llinia dotada con tres millones d’euros que podrá ampliase en función de la demanda de los propietarios perxudicaos.

Na xunta de güei, l’Executivu fizo un balance de les actuaciones feches nel últimu añu dempués de la fola de fueos qu’afectaron a 51 conceyos y 32.000 hectárees (12.000 arbolaes, 18.000 de matos, 500 de pastizal y 1.500 dedicaes a otros usos) y que provocaron estrozos de gran consideración en mases arbolaes de rexeneración natural y repoblación forestal, tanto en tarrenes d’utilidá pública como privaos.

El Gobiernu afonda en que los presupuestos d’esti añu recueyen una medría del 43% pa polítiques forestales, hasta 12,3 millones, y que la Conseyería de Fomentu, Cooperación Local y Prevención d’Incendios trabaya na fechura del nuevu plan qu’ordena los recursos pa la xestión total d’incendios mientres que’l presupuestu del Serviciu d’Emerxencies xubió esti añu un 10% hasta los 44 millones.