El Gobiernu destaca'l trabayu a comuña con Asturies pal relevu nel sector agrariu

Asturies, "precursora" col ticket rural

La secretaria d’Estáu d’Agricultura y Alimentación, Begoña García, destacó esti martes el trabayu fechu a comuña col Gobiernu d’Asturies p’asegurar el relevu xeneracional nel sector agroalimentariu.

Asina lo señaló nuna visita al Principáu na que la secretaria d’Estáu tendrá alcuentros con autoridaes locales, dirá a delles instalaciones productives y citaráse colos responsables de los grupos de desendolcu local.

Acompañada del conseyeru de Mediu Rural y Política Agraria, Marcelino Marcos, nuna visita al centru que l’Asociación d’Investigación d’Industria de la Carne del Principáu d’Asturies (Asincar) tien en Noreña, García esplicó que la mocedá cunta con tres problemes p’acceder a esta actividá, como son l’accesu a la tierra, la financiación y la formación y asesoramientu.

Nesti puntu, destacó’l llabor del Bancu de Tierra del Principáu, cola cesión de tarrenes "infrautilizaos" a aquellos que "lo necesiten".