El Gobiernu diz que nun tien pensao nacionalizar les plantes d’Alcoa

CCOO refuga la regulación porque "abandona" al 70% de la plantiya

El Gobiernu nun tien pensada la nacionalización de les plantes d’Alcoa n’A Coruña y Avilés (Asturies), nes que la multinacional del aluminiu de los Estaos Xuníos planteó’l pieslle y un espediente de regulación de trabayu (ERE) pa los 686 trabayadores de los dos centros de trabayu.

Fontes de la Secretaría Xeneral d’Industria indicaron güei que’l Gobiernu nun tien pensaes soluciones contraries a la normativa comunitaria, como sedría la nacionalización de les plantes.

Amestó que l’Executivu tien como oxetivu principal garantizar los puestos de trabayu y les capacidaes industriales de les plantes d’Alcoa n’Avilés y A Coruña, y que sigue trabayando y anima a les partes a llegar a un alcuerdu nesi sen.

La representación de los trabayadores d’Alcoa nes dos fábriques convidaron al grupu mercantil a valorar l’impactu económicu del pieslle de les plantes y a provisionar esa cuantía pa ser entregada al Gobiernu d’España, cediéndo-y al empar la titularidá.

El sindicatu CCOO espresó güei’l so refugu a la propuesta d’Alcoa pa les plantes d’A Coruña y Avilés (Asturies) que quier pesllar, al considerar que "abandona" al 70% de la plantiya d’estes fábriques. CCOO dixo que la empresa debe tener un mayor compromisu na busca d’una alternativa al pieslle y que los sindicatos pidieron na xunta d’ayeri a la dirección d’Alcoa qu’entregue la cantidá que piensa desembolsar nel procesu y la titularidá de les dos empreses.