El Montepío denuncia a Villa y a Postigo por un delitu societariu

Asegura que lleva dende 2014 faciendo un "llabor de colaboración abierta y lleal"

El Montepío de la Minería formuló una denuncia espresa escontra l'ex-líder mineru José Ángel Fernández Villa y l'ex-presidente d'esta entidá José Antonio Postigo como presuntos autores d'un delitu societariu deriváu de los delitos que s'investiguen dientro de la Operación Hulla.

El Montepío, como diere anuncia la selmana pasada, tamién pidió yá énte'l Xulgáu d'Instrucción númberu 3 d'Uviéu poder personase na causa abierta pol "casu Hulla" como acusación particular col fin d'exercitar les acciones que pudieren corresponder a esta entidá.

Según informa'l Montepío nun comunicáu, énte les noticies que tien de la posibilidá de que se cometiere un delitu societariu de los previstos nel artículu 295 del Códigu Penal decidió formular denuncia de forma espresa a Postigo y Fernández Villa, "y escontra toles persones y entidaes que pudieren ser responsables de los fechos denunciaos y investigaos, causantes d'un evidente dañu a la nuesa entidá".

L'equipu llegal que representa los intereses de la mutualidá tará dirixíu pol penalista Miguel Ruiz, cola collaboración de Pablo Pérez, que yá ta llevando les causes civiles rellacionaes, informó la mutualidá nun comunicáu.

El Montepío asegura que lleva dende 2014, tres la llegada de Juan José González Pulgar a la Presidencia, faciendo un "llabor de collaboración abierta y lleal" na investigación que lleva alantre la Fiscalía Anticorrupción de cualquier situación irregular fecha nos años de xestión d'enantes.

Ente otres midíes, la mutualidá presentó a finales del añu pasáu una reclamación de dos millones d'euros escontra'l constructor, l'arquitectu y l'apareyador de la obra de la Residencia de Felechosa polos "incumplimientos claros detectaos" na execución del xeriátricu gracies a una auditoría encargada pol propiu Montepío.

La mutualidá decidió agora personase como acusación particular na causa xudicial, qu'investiga dellos delitos al rodiu de la construcción del xeriátricu de Felechosa nel mandatu del anterior presidente, Juan Antonio Postigo, al considerase "gravemente perxudicada".

Amás del propiu Postigo, el pasáu 29 de mayu fueron prindaos el propietariu de la constructora qu'executó la obra del xeriátricu, Juan Antonio Fernández; l'arquitectu, Manuel Sastre, y l'ex-asesor fiscal de la mutualidá, Jose Manuel Fernández, que, tres prestar declaración, quedaron en llibertá provisional ensin fianza.

La xueza, que tamién investiga al ex-secretariu xeneral del SOMA-UXT José Ángel Fernández Villa y a la so familia y a la de Postigo, imputa a los implicaos los presuntos delitos de blanquéu de capitales, fraude de subvenciones, falsedá de documentu oficial y mercantil, tráficu de subvenciones, apropiación indebida, escontra la facienda pública, malversación, sobornu y prevaricación.