El PP acusa a Fernández d'apurrir Asturies a Podemos a preciu de saldu

Fernández recuerda al PP que siempre buscó un alcuerdu con Podemos y IX

"El presidente del Principáu, Javier Fernández, apurrió Asturies a la radicalidá de Podemos a preciu de saldu", según aseguró güei la vocera del PP, Mercedes Fernández, na segunda sesión del alderique sobre l'estáu de la rexón que se celebra güei na Xunta Xeneral del Principáu.

La presidenta del PP referíase asina a la intervención -"un timu de discursu"- col que'l xefe del Executivu asturianu empecipió ayeri esti plenu, nel qu'ufiertó a los grupos de la izquierda la posibilidá de llegar a alcuerdos y consensos pa lo que resta de llexislatura.

"Ayeri foi un día penosu p'Asturies, que tien derechu a un optimismu del qu'usté carez, a llograr les respuestes que nun quier o nun sabe dar, que nun se merez siguir reculando nos furgones de cola nin un gobiernu al debalu", afirmó la presidenta de los populares asturianos.

Na so opinión, el presidente del Principáu apurrió a la formación morada "los 19 meses que queden de llexislatura", a pesar de que la mayoría de los asturianos quieren polítiques moderaes y ensin estridencies, lloñe del radicalismu de Podemos.

La vocera popular, que llegó a referise al xefe del Executivu como "diputáu Fernández, porque nun merez el títulu de presidente", pidió-y que colara porque los 19 meses que resten de llexislatura "son demasiaos pa facer lo qu'esbozó ayeri: una unidá anticorrupción y la estensión de la educación de cero a tres años".

"Equí'l problema ye'l presidente, que nun lidera", incidió la presidenta del PP asturianu, que conseñó qu'Asturies nun merez l'entreguismu a la radicalidá del que fixo ayeri gala" de forma barata, inadecuada y impropia".

Na so opinión, quedó claro que "el Gobiernu nun tien idees y que ta entregáu a la radicalidá de Podemos" porque lo único qu'ufiertó foi una unidá d'anticorrupción y un alcuerdu en materia d'educación infantil "cuando los asturianos esperen respuestes y alternatives".

"A los que sentimos España, y sobre manera a los que sentimos Asturies, xelósenos ayeri'l sangre", amestó Mercedes Fernández en señalando que nun s'entiende que s'apurra a Podemos en cuenta de dos cuestiones nes que ye posible l'alcuerdu "dende la moderación y la centraliá" y ensin necesidá d'apurrir Asturies "a una fuerza radical y estremista ensin nengún miramientu".

La vocera popular centró bona parte de les sos crítiques na xestión que ta faciendo'l Gobiernu rexonal na educación, la llista d'espera sanitaria o'l salariu social que, na so opinión, foi oxetu d'una xestión "llamentable" que fixo que siga medrando "de forma estrueldosa".

Fernández criticó tamién la posición que caltién agora'l PSOE en cuanto al asturianu porque, na so opinión, n'Asturies cuasi naide quier la cooficialidá de la llingua, "que nun se necesita pa nada".

Na so opinión, esti Gobiernu ye "un desastre xestionando lo público y l'interés xeneral, porque nun saben o porque nun quieren", y tien que revisar les subvenciones en materia d'empléu porque "maten la iniciativa y nun sirven pa crear, sinón pa dormise en munches ocasiones".

La presidenta de los populares asturianos recordó amás que foi col PP con quien el PSOE apautó los presupuestos de los años 2015 y 2017 "porque queremos Asturies" y porque "a un mal gobiernu tien qu'enfrentase una oposición razonable".

Fernández recuerda al PP que siempres buscó un alcuerdu con Podemos y IX

El presidente del Principáu, Javier Fernández, alvirtió güei al PP de que la propuesta d'algamar un alcuerdu con Podemos y IX pa conformar una mayoría parlamentaria plantegada ayeri al entamu del alderique sobro l'estáu de la rexón nun camudó dende l'empiezu de la llexislatura.

Na so respuesta a la intervención de la líder del PP, Mercedes Fernández, que lu acusó d'apurrir "a preciu de saldo" Asturies a los radicales, el xefe del Executivu incidió en que la so ufierta d'alcuerdu presupuestariu a dambes formaciones nun fai más que repitir les plantegaes na Xunta dende va tres años.

"Usté nun fala pa rebatir argumentos sinón pa escitar a la so propia parroquia y el so grupu de hooligans siempres ta dispuestu", apuntó'l presidente asturianu que, n'alvirtiendo de que nun se considera un pesimista, consideró que nel casu de la líder del PP "ser optimista ye nun enterase de nada".

Amás, sorrayó qu'aceptar la Unidá Anticorrupción non dependiente del Gobiernu que pide Podemos nun supón "desnaturalizar" el so programa electoral magar que nun-y guste una iniciativa d'esi tipu, pero aceptala supón faer "una concesión" en favor de la posibilidá d'algamar un alcuerdu presupuestariu.

Na vez de réplica y contrarréplica, el presidente asturianu contestó amás al allugamientu de la vocera popular a que colara -"¿va colar?", cerró la so intervención la líder del PP- pa garantizar que se va caltener nel cargu hasta'l final de la llexislatura que va concluyir en mayu de 2019.

Fernández rebatió tamién les acusaciones de "desgana personal" de la líder del PP pa llamentar que recurra a estereotipos y apuntó que, nel so casu y d'actuar de la mesma manera, podría falar, tres la relación que caltuvo con Mariano Rajoy na so etapa al mandu de la xestora del PSOE, d'un presidente del Gobiernu "na hamaca, fumando un puru y lleendo'l Marca".

Ante les protestes dende la bancada popular, el xefe del Executivu asturianu incidió no "sensibles" que tán los diputaos del PP si s'utilicen argumentos similares a los de la so presidenta y emplazólos a respetase "a sí mesmos".

Tocante a la cooficialidá del asturianu, el xefe del Executivu repitió la so negativa a impulsala nesta llexislatura pese al cambéu de criteriu de la FSA, una midida que la nueva dirección del so partíu "va esplicar" a los ciudadanos y va llevar a les próximes elecciones con esa propuesta "y eso ye daqué llimpio y tresparente".

"Yo nun lu voi a faer por coherencia", sorrayó en defendiendo la xestión del so conseyeru d'Educación, Genaro Alonso, que como filólogu consideró que lo meyor pal asturianu sedría la oficialidá, "una afirmación obvia", según Fernández, que cuestionó sicasí que seya "lo meyor" pa los asturianos.

Amás, incidió en que nesta llexislatura tampoco plantega abordar una reforma del Estatutu d'Autonomía una iniciativa que consideró difícil pol "arca de Noé" que constitúi la Xunta "con tantes especies polítiques"- y que recordó que s'atayó en 2007 por un discutiniu "banal" sobre la capitalidá d'Asturies.

Pa Fernández, el discursu de la líder del PP lléndase a facer "xuicios de valor" utilizando una gran cantidá de palabres "pa tan poca cantidá de pensamientu" y a defender "en formación tortuga" les midíes del Gobiernu central anque seyan perxudiciales p'Asturies "dende la eterna oposición na que ta sumida".