El PP denuncia "desgobiernu" na OSPA y pide esplicaciones a la xerente y la conseyera de Cultura   

Los populares denuncien "vicios ocultos" nel últimu procesu selectivu de la Orquesta Sinfónica del Principáu

El PP pidió esti llunes esplicaciones a la conseyera de Cultura, Vanessa Gutiérrez, pol "desgobiernu y el caos" na xestión de la Orquesta Sinfónica del Principáu d'Asturies (OSPA). L'últimu procesu selectivu pa cubrir con personal fixu places de vigulín paez ser que tuvo "vicios ocultos".

El diputáu popular José Luis Costillas afirmó que la sinfónica asturiana “ta morriendo dende va munchu tiempu" porque'l Gobiernu asturianu abandonóla "a la so suerte", al llevar tres años ensin director titular, amenorgar la so programación nacional y internacional y vivir una "auténtica fuga de talentos".

"Ye más conocida polos escándalos y los procedimientos xudiciales que pola so actividá musical", afitó'l parllamentariu, quien alvirtió, al respective, que'l so conseyu rector lleva "más d'un añu ensin convocase".

Xunío a ello, denunció'l "últimu capítulu del serial d'escándalos" de la OSPA, un procesu d'estabilización pa consolidar tres places nel que cuatro de los cinco esaminaos "sacaron un cero sobro trenta", la mesma nota que recibiría "daquién que nun tocó'l vigulín na so vida".

Costillas esplicó qu'estos aspirantes lleven "años" trabayando como interinos na orquesta y cunten con una carrera profesional reconocida.

"Lleven años interpretando les mesmes pieces del procesu selectivu. ¿Cómo ye posible?", preguntóse'l diputáu en rueda de prensa na qu'anunció que'l PP va pidir la comparecencia de la conseyera de Cultura y la Xerencia de la sinfónica.

Amás, denunció que nun hai una grabación oficial de les pruebes y nun se dexó la presencia de públicu, polo que, al so xuiciu, "too paez indicar" qu'esti procesu de selección "tuvo vicios ocultos pa evitar que se cubriera con personal fixu les places".

Amás, Costillas esplicó que más del 30 por cientu de la plantiya son temporales y hai más de diez places xudicializaes.

Unu de los músicos afectaos ye Pablo de la Carrera, vigulinista con más de venti años de trayectoria profesional, dellos na OSPA y que tamién foi miembru de la Malaysian Philharmonic Orchestra y de la Orquesta Metropolitana de Lisboa.

"Ye un insultu a la mio persona. Ye una inxusticia y una humildación", dixo tres llograr un cero na prueba na que participó.

El vigulinista pidió esplicaciones a la Xerencia de la OSPA, una orquesta que ta sufriendo un "dañu enorme" nos últimos años.

Pela so parte, Cristina Esteban, de CSIF, esplicó que, tres presentar allegamientos, el sindicatu va llevar esti asuntu a los tribunales.

Alvirtió de que la xestión de personal na sinfónica ye "nefasta" y "arbitraria" y pidió responsabilidaes porque "cualquier día la OSPA cuelga'l cartelu de zarráu".