El PP pide al PSOE asturianu que s'amieste al "refugu total" al pactu fiscal en Cataluña

Luis Venta: "La Xunta Xeneral tien que ser clara y contundente"

El PP rexistró esti martes la convocatoria urxente de la Xunta de Portavoces del parllamentu na que pidirá al restu de partíos de la Cámara que s’amiesten a una declaración institucional de "refugu total" al alcuerdu ente’l PSC y ERC en Cataluña.

El PP treslladó al restu de fuerces polítiques una propuesta de declaración na qu’alerta de que’l pactu supón "un ataque ensin precedentes a los principios básicos" que tienen que rexir cualquier modificación del sistema de financiación autonómica, como son la "solidaridá, equidá, suficiencia, llealtá institucional y seguridá xurídica".

El diputáu axuntu del PP, Luis Venta, esplicó que’l testu diz que "nenguna comunidá" tien que sufrir una mengua de la so financiación énte una reforma del modelu, que tien que garantizar "una meyor suficiencia pal cumplimientu de la prestación de los servicios públicos de la so competencia".