El PSOE llogra una rotunda victoria nel Principáu

PSOE 20; PP 10; Ciudadanos 5; Podemos 4; IX-IAS 2; Foro 2; Vox 2

El PSOE confirma la so victoria nes elecciones autonómiques n'Asturies con más del 90% del escrutiniu fechu y llogra 20 diputaos -seis más qu'en 2015- y dobla a la segunda fuerza política, el PP, que con 10 escaños algama'l doble de los de Ciudadanos.

Esti resultáu constitúi'l meyor llográu polos socialistes nel Principáu -onde s'impunxeron n'ocho de les 10 elecciones autonómiques celebraes hasta agora- dende los comicios de 2007 cuando llograron ventiún representantes.

El PP pierde dos escaños al respective de 2015 colo que Ciudadanos nun llogra'l so oxetivu de superar a los populares al consiguir cinco escaños, dos más de lo que consiguió va cuatro años.

Podemos ye la cuarta fuerza política con cuatro diputaos -cinco menos- mientres qu'IX llogra dos frente a los cinco de 2015 colo que los socialistes nun sumen la mayoría absoluta xunto a la coalición y necesitaríen de Podemos p'algamala.

Amás, la suma de PSOE, Podemos y IX queda a un escañu de los 27 votos necesarios pa encarar la reforma del Estatutu d'Autonomía que se necesita pa declarar la cooficialidá del asturianu que sofiten les tres formaciones d'izquierdes.

Foro consigue dos escaños -unu menos qu'en 2015- y Vox entra na Xunta Xeneral del Principáu con dos representantes y en dambos casos, al igual que nel d'IX, nun llogren los diputaos abondos pa conformar grupu parlamentariu na Cámara autonómica.