El Principáu amplía la temporada de caza un mes

La cifra de xabalinos abatíos va llegar a 13.000 esta temporada

El númberu de xabalinos abatíos n'Asturies na actual temporada de caza d'esta especie, primeramente programada ente'l 16 d'ochobre y el 11 de febreru, va superar los 13.000 exemplares, según la previsión de la Conseyería de Mediu Rural y Cohesión Territorial dempués de qu'hasta xineru se rexistrara un aumentu del 15%.

El Gobiernu treslladó güei estos datos na xunta del Conseyu Rexonal de Caza na que s'estudiaron les midíes puestes en marcha pa controlar la población de xabalinos, ente les que ta l'ampliación de la temporada de caza, lo que va dexar a los cotos rexonales facer batíes nel so territoriu nel mes de marzu.

La Conseyería destacó amás que tamién s'impulsaron planes estraordinarios de caza en zones costeres y de cultivos, controles n'abellugos por parte de les sociedaes de caza y otros selectivos nes zones periurbanas por parte de la Guardería del Mediu Natural y de les sociedaes d'arqueros collaboradores.

L'oxetivu, apuntó'l Gobiernu, ye meyorar la xestión de la población d'esta especie y desaniciar l'impactu negativu sobro la sanidá animal, la ganadería y los cultivos porque la medría del númberu d'exemplares xenera perxuicios na biodiversidá y na seguridá vial.

L'aumentu de la densidá de xabalinos rexistráu nos últimos años ye un fenómenu común a tola Xunión Europea (XE) y, dempués de que la Comisión lu reconociera como una de les principales amenaces a la biodiversidá, les actuaciones propuestes n'Asturies allíniense, según el Principáu, coles directrices comunitaries nesta materia y la nueva Estratexa Nacional de Xestión Cinexética.

Amás, el Gobiernu asegura que'l programa de control va dexar tener un marcu d'actuación con oxetivos claros y un sistema d'indicadores pa cada midida de manera que puea abordase'l problema del xabalín de manera sostenida y sostenible, evaluando resultaos de forma tresparente y tomando decisiones basaes nos datos disponibles.