El Principáu aplaza una selmana l'análisis regulatoriu de los parques de bateríes

Zapico apuesta pola creación d'una empresa pública d'enerxía

El conseyeru d’Ordenación de Territoriu, Urbanismu, Vivienda y Derechos Ciudadanos, Ovidio Zapico, decidió aplazar al miércoles viniente la xunta de la comisión permanente de la Comisión d’Urbanismu y Ordenación del Territoriu d’Asturies (Cuota) que definirá’l marcu regulatoriu que rexirá la instalación de parques de bateríes nel Principáu.

Zapico esplicó que la comisión permanente de la Cuota decidió retirar esti puntu de la xunta celebrada esti xueves y aplazar una selmana’l so debate col envís de "garantizar la seguridá xurídica total" d’esi marcu regulatoriu, que valdrá como base al futuru decretu que ta previsto asoleyar pa finales d’esti añu.

El conseyeru apostó pola creación d’una empresa pública d’enerxía que s’encargue del desendolcu d’estes instalaciones, lo que "garantizaría un preciu xustu de la enerxía y evitaría la especulación".

El titular d’Urbanismu destacó que l’oxetivu ye qu’esta regulación "reflexe dafechu la voluntá política d’esti Gobiernu, espresada públicamente énte los vecinos afectaos por esti tipu de proyectos, d’afitar llendes pa una protección efectiva de la ciudadanía del mediu rural".