El Principáu compra un edificiu n'Uviéu pal centru de víctimes d'agresión sexual

El nuevu Centru de Crisis de Víctimes tará en La Corredoria

El Gobiernu del Principáu compró, por un importe de 1.160.000 euros con cargu a los fondos europeos, un edificiu nel barriu uvieín de La Corredoria p’agospiar les nueves instalaciones del Centru de Crisis de Víctimes d’Agresiones Sexuales, lo que dexará ampliar l’abanicu de servicios especializaos.

Según informó esti miércoles l’Executivu autonómicu, la Dirección Xeneral d’Igualdá trabaya col envís de que’l treslláu seya nel últimu trimestre d’esti añu. Asturies foi precursora al inaugurar en payares de 2020, tamién n’Uviéu, el primer centru de crisis pa víctimes d’agresiones sexuales d’España.

Esti centru ufierta atención darréu y especializada a muyeres víctimes d’agresiones sexuales nel Principáu d’Asturies y opera 24 hores al día los 365 díes del añu. El serviciu caracterízase pola so intervención en crisis o emerxencia, atendiendo de manera rápida nel llugar onde tea la víctima si fai falta. Amás, tamién se da atención a muyeres que, sufriendo una agresión sexual nel pasáu, deciden buscar terapia psicolóxica, asesoramientu xurídicu o presentar una denuncia.