El Principáu confía en que la xusticia seya rápida na 'Operación Hulla'

Recuerda que’l siguimientu del Montepío correspondía dafechu al Estáu

El Gobiernu asturianu señaló güei que nun tuvo "nenguna participación" nel procesu siguíu pa la construcción de la residencia xeriátrica "La Minería", en Felechosa (Ayer), fechu directamente pol Montepío de la Minería Asturies con partíes procedentes de los fondos mineros, y que'l llabor de siguimientu yera de l’alministración central.

En rueda de prensa tres la xunta del Conseyu de Gobiernu, el so cabezaleru, Guillermo Martínez, treslladó’l sofitu del Executivu a l’acción de la xusticia dempués de que la Fiscalía Anticorrupción y el xulgáu númberu 3 d’Uviéu punxeren ayeri en marcha la "Operación Hulla", que se saldó con cuatro prindamientos.

"Tenemos enfotu na xusticia y esperemos que seya lo más rápida posible", señaló Martínez dempués de que la Guardia Civil prindare ayeri al ex-presidente del Montepío José Antonio Postigo y citare como investigaos al ex-secretariu xeneral del SOMA-UXT José Ángel Fernández Villa y a dellos familiares de dambos.

Na operación pa construyir el xeriátricu "La Minería", que supunxo una inversión de 31 millones d’euros con cargu a los fondos mineros, céntrense les sospeches del orixe de los 1,4 millones d’euros que Fernández Villa regularizó na amnistía fiscal de 2012 a la que tamién s’acoyó Postigo con 360.000 euros.

El cabezaleru del Executivu asturianu recordó que la obra llevóse alantre al traviés d’un conveniu billateral ente l’Estáu y la mutualidá minera y que’l Principáu nun xugó "nengún tipu de papel" como alministración nel control o la execución de les obres.

El xeriátricu de Felechosa foi la única inversión incluyida nos fondos aportaos pol Estáu pa compensar la reconversión minera que nun foi fecha por una alministración –local, autonómica o estatal– lo que necesitó un cambéu de normativa aprobáu en 2009 pa que los proyectos financiaos con esa partida pudieren facelos entidaes ensin ánimu d’arriquecimientu como’l Montepío.

Al respeutive de la incidencia que la investigación xudicial abierta puea tener nes inversiones entovía pendientes con cargu a los fondos mineros –eliminaos pol Gobiernu central en 2011 y llevada a los tribunales pol Principáu–, Martínez señaló que l’Executivu del PP yá tomó decisiones escontra estes partíes "enantes de que se conociere nengún tipu d’irregularidá".

"El llabor d’inspección correspondía al Gobiernu d’España que nun necesitó de nenguna disculpa nin fechu siguíu pa tomar decisiones a la escontra de les cuenques mineres y pa romper los sos compromisos", amestó’l cabezaleru del Executivu asturianu.