El Principáu esixe'l cumplimientu del Pactu escontra la Violencia de Xéneru

Señala que de los 200 millones comprometíos namá se contemplen 80

El conseyeru de Presidencia y voceru del Executivu rexonal, Guillermo Martínez, repitió güei la so esixencia al Gobiernu central pa que dea cumplimientu "en tolos sos estremos" al Pactu d'Estáu escontra la Violencia de Xéneru, incluyíu'l so financiamientu nos presupuestos xenerales.

Na rueda de prensa posterior al Conseyu de Gobiernu, que güei se celebró nel Conceyu de Santu Adrianu, Martínez recordó que'l proyectu de Presupuestos Xenerales del Estáu namás incluyen 80 de los 200 millones d'euros comprometíos nel Pactu d'Estáu, de forma que falta'l conseñamientu de los 120 millones que se diben a repartir ente conceyos y comunidaes autónomes.

El voceru del Gobiernu del Principáu llamentó que'l Gobiernu nun respondiera a los escritos unviaos dende l'Executivu rexonal y avanzó la so disposición a contactar con otres comunidaes autónomes pa esixir el cumplimientu del Pactu d'Estáu "en tolos sos estremos".

Martínez recordó qu'Asturies foi una comunidá autónoma pionera na puesta en marcha d'un pactu escontra la violencia de xéneru, qu'enantes de llegar al so ecuador de cuatro años yá implementó'l 91 por cientu de les midíes y el 63 por cientu de les partíes presupuestaries.

Amás, repitió la esixencia del Executivu rexonal nuna xornada na que cerca de 300 organizaciones feministes convocaron movilizaciones en más de 70 ciudaes d'España, ente elles Uviéu y Xixón, pa esixir al Gobiernu central que cumpla colos sos compromisos y financie'l pactu d'Estáu escontra la Violencia de Xéneru colos 200 millones que prometió.