El Principáu llama a la responsabilidá pa recuperar la estabilidá n’España

Guillermo Martínez diz que la situación política nacional ye "esceicional"

El Gobiernu del Principáu fizo güei un llamamientu a tolos grupos políticos pa que tean "a l’altura política afayadiza" pa que’l país recupere una "estabilidá necesaria dafechu" dempués de la "grave" sentencia del casu Gürtel que provocó la moción de censura presentada pol PSOE escontra Mariano Rajoy.

En declaraciones a los medios dempués de la rueda de prensa del Conseyu de Gobiernu, el cabezaleru del Executivu asturianu, Guillermo Martínez, espunxo que la situación política nacional ye "esceicional", porque la sentencia del casu Gürtel ye de "una gravedá innegable".

Esta situación, que foi analizada güei pol Conseyu de Gobiernu, esixe que tolos grupos tean a l’altura pa tomar les decisiones afayadices "pa superar esta situación inaguantable y recuperar la estabilidá", recalcó Martínez.

Martínez fizo esti llamamientu un día enantes de que’l Congresu de los Diputaos alderique al rodiu de la moción de censura que’l líder socialista, Pedro Sánchez, presentó escontra l’Executivu de Mariano Rajoy, la cuarta dende la llegada de la democracia y la segunda qu’afronta’l presidente del Gobiernu nesta llexislatura.