El Principáu presenta la primer FP intensiva

L'alumnáu fadrá polo menos 700 hores práctiques remuneraes nes empreses

Educación normalizará a finales d’añu’l funcionamientu de les escueles autonómiques de 0 a 3

La robla de güei coles inmobiliaries asturianes foi la puesta de llargu de la formación dual intensiva. Ente 20 y 25 alumnos y alumnes podrán formase en Xestión de Ventes y Espacios Comerciales, un grau impartíu nel Centru de La Llaboral de Xixón, con un complementu formativu prácticu adaptáu a la demanda de les axencies. Tendrán un mínimu de 700 hores práctiques nes empreses y sedrán retribuyíos económicamente por ello.

Una trentena d’inmobiliaries de toa Asturies participarán na iniciativa. Anguaño dan trabayu a unes 1.500 persones, pero creen qu’hai marxe pa dir más p’allá.

La Conseyería espera que s’involucren ente 3.500 y 5.000 empreses na FP dual, la única qu’existirá dende’l cursu viniente en dos vertientes diferentes: una xeneral, con 500 hores práctiques n’empreses; y la dual intensiva, con polo menos 700 hores y pagada. Enagora la Conseyería nun pue concretar cuántes empreses podríen amestase a la modalidá intensiva.

La conseyera d’Educación responde a los sindicatos que s’avanzaron en dalgunos puntos de les sos reivindicaciones como los díes propios. Lydia Espina asegura que les medies xornaes sedrán historia en setiembre. Los sindicatos del sector convocaron una manifestación pal vienres viniente.

Educación normalizará a finales d’añu’l funcionamientu de les escueles autonómiques de 0 a 3

La conseyera presentó en Grau’l proyectu de la rede autonómica de 0 a 3, al que s’axuntaron 58 ayuntamientos. Espina asegura que ta too planificao y que tará afitao de manera definitiva a final d’añu.

Dende’l cursu 24-25 los nomamientos de los directivos d’estos centros convocaránse cada cuatro años por proyectu. Anguaño namás se presentaron dos profesionales a 17 places de director, un puestu pocu atractivu poles sos condiciones, según los sindicatos.