El Principáu quier garantíes pa caltener los controles de población del llobu

Xunta de los conseyeros de Mediu Ambiente d'Asturies, Castiella y Lleón, Galicia y Cantabria

Los conseyeros de Mediu Ambiente de Castiella y Lleón, Galicia, Cantabria y Asturies axuntáronse coles organizaciones profesionales agraries pa falar del llobu.

Toos tán a la escontra de que'l Gobiernu central decidiera qu'a partir del 25 de setiembre tea na llista d'especies de protección especial, el Lespre. Una midida qu'echa embaxo los actuales planes de xestión que tienen estes comunidaes. Asturies pide una moratoria mientres se negocia'l nuevu escenariu.

El conseyeru Alejandro Calvo afita'l diálogu col Ministeriu pa trabayar na renovación de la estratexa de caltenimientu del llobu ibéricu, pero pide garantíes xurídiques pa que, mientres, el Principáu puea siguir aplicando'l so plan de xestión, incluyida la caza pa controlar la población.

L'oxetivu ye llograr un consensu que dexe la coesistencia del llobu cola ganadería estensiva. El conseyeru asturianu entiende qu'esta actividá económica, imprescindible pal mediu rural, tamién ye importante pal caltenimientu de la biodiversidá.

Asturies yá trabaya nos allegamientos que va presentar a la orde ministerial qu'inclúi al llobu na llista d'especies d'especial protección.