El Principáu trabayará p'algamar la especialidá docente del asturianu

Rifirrafe pol usu del asturianu na intervención de Piñán na Xunta

El Gobiernu del Principáu pondrá en marcha nos meses vinientes un Conseyu Asesor de Política Llingüística y trabayará p'algamar la especialidá docente del asturianu.

La conseyera de Cultura, Política Llingüística y Turismu, Berta Piñán, fizo esta anuncia na so intervención na Xunta Xeneral, onde dio cuenta del so programa de gobiernu, qu'entamó con un rifirrafe pol usu d'esta llingua.

Piñan avanzó qu'unu de los oxetivos del Executivu asturianu ye trabayar pa una propuesta de modelu d'oficialidá "realista, acordies cola situación sociollingüística asturiana y fechu sobre'l consensu".

Nesti sen, dio anuncia de que se crearán comisiones permanentes a comuña cola conseyería d'Educación y la de Ciencia, Universidá y Anovación.

Tamién esplicó que se trabayará cola Xunta Asesora de Toponimia pa completar esta llexislatura l'estudiu y la revisión de la toponimia tradicional, y p'avanzar nel so usu alministrativu y nel so espardimientu cartográficu.