Noticies n'asturianu
Fuente: RTPA, 20 de abril. 2019 18:54

El Principáu va autorizar el llunes el conveniu del plan de víes de Xixón

En castellano: El Principado autorizará el lunes el convenio del plan de vías de Gijón
Vista del solarón y las vías de tren en Gijón

La sociedá va celebrar el mesmu día una xunta xeneral estraordinaria y un conseyu d'alministración

El Conseyu de Gobiernu d'Asturies va autorizar esti llunes al titular d'Infraestructures, Ordenación del Territoriu y Mediu Ambiente, Fernando Lastra, la firma del conveniu que va dexar desenvolver les obres de la integración ferroviaria en Xixón.

 

La sociedá, constituyida en 2002 y participada nun 50% pol Ministeriu de Fomentu, y nel 50% restante pol Conceyu de Xixón y el Principáu, va celebrar el mesmu llunes en Madrid una xunta xeneral estraordinaria y un conseyu d'alministración. Nesa xunta va someter a aprobación el conveniu del plan de víes, incluyíu'l préstamu participativu que tienen que  suscribir los accionistes. El preste previu del Conseyu de Gobiernu ye preceptivu pa que Lastra puea ratificar el conveniu na mesma xunta.

 

El sofitu a esti proyectu produzse dempués de que'l pasáu miércoles, 17 d'abril, el Conseyu de ministros autorizó la firma del conveniu pa la integración ferroviaria de Xixón, que va suponer una inversión estimada en más de 1.000 millones d'euros, de los que tán pendientes d'executar alredor de 814 millones.

 

El nuevu conveniu sustitúi al robláu en 2002 y básase na solución que se ta contemplando nel estudiu informativu que ta anguaño en redacción, qu'alluga la futura estación intermodal na zona qu'hai frente al Muséu del Ferrocarril.

 

Ente les actuaciones previstes, que se van executar ente 2019 y 2025, ta la construcción d'una terminal de cercaníes y la so conexón col metrotrén, valorada en 140,16 millones d'euros, y otra de llargu percorríu y anchu métricu, por importe de 108,51 millones d'euros.

 

Amás d'un nuevu edificiu de viaxeros na zona más próxima al edificiu principal del Muséu del Ferrocarril, que va tener una inversión de 8,9 millones, va construyise una terminal d'autobuses, con un valir qu'algama los 30 millones.

 

El plan de víes contempla, amás, la urbanización de los suelos, valorada en 66,02 millones d'euros.

 

Coles mesmes, el conveniu inclúi la execución y puesta en serviciu por parte d'ADIF del metrotrén dende'l pozu d'estracción hasta Viesques, y el so allargamientu hasta l'Hospital de Cabueñes, too ello con un costu total estimáu de 313,66 millones d'euros.

Comparte