El SOMA quería comprobar que'l dineru de l'amnistía nun salía del sindicatu

Difícil reiniciu del xuiciu escontra José Ángel Fernández Villa

El xuiciu escontra l'ex-secretariu xeneral del Soma-UXT José Ángel Fernández Villa volvió entamar esta mañana ente les continues protestes de la defensa pola negativa del tribunal a aceptar el plantegamientu d'entrugues a los testigos por considerales "improcedentes" o "intrescendentes".

L'abogada Ana García Boto, qu'exercita la defensa de Fernández Villa, manifestó la so protesta por nun llograr que fuera p'alantre'l so pidimientu pa que l'actual secretariu xeneral, José Luis Alperi, quedara nel interior de la sala al acabar la so declaración, por si resultaba necesaria la so presencia pa un posterior caréu con otros testigos.

La presidenta del tribunal de la Sección Tercera de l'Audiencia Provincial d'Uviéu, Maria Luisa Barrio, nun cedió a la so solicitú y autorizó a Alperi a abandonar les dependencies xudiciales si lo deseaba, como fixo'l testigu.

La defensa quería qu'Alperi siguiera en sala y argumentó que'l so pidimientu respondía "a la necesidá de que quede como garantía del derechu de defensa por si ye necesario pidir un caréu" y evitar asina que pudiera comunicase con otros testigos.

La presidenta recordó a la defensa que "ta nel so derechu de pidir un caréu" pero puntualizó que va ser el mesmu tribunal el que decida si procede o non facelo, una vez pidíu.

"Nun me rete, señora lletrada", llegó a dicir la presidenta a la defensa dempués de qu'Ana García Boto plantegára-y si podía facer entrugues énte la reiteración de protestes de la defensa pola alvertencia del tribunal sobro la improcedencia de delles de les cuestiones plantegaes pola lletrada a los testigos.

"Usté namás pregunte", contestó-y la maxistrada a la defensa en ratificando que "va ser el tribunal el que decida la so procedencia o improcedencia".

Na so declaración, José Luis Alperi, aseguró que'l sindicatu decidió facer una auditoría pa comprobar que'l dineru regularizao na amnistía fiscal pol so predecesor, José Ángel Fernández Villa, nun saliera de la organización.

Alperi, que señaló que'l control contable del sindicatu llevábalu Juan Cigales, apuntó que l'ampliación de la querella fízose pa recuperar "el supuestu menoscabu patrimonial que sufrió'l sindicatu".

Alperi esplicó que lo primero que fizo al asumir la nueva dirección yera "exercer toles acciones xurídiques necesaries, incluyíes les penales, pa recuperar esi supuestu menoscabu".

El secretariu xeneral del sindicatu ratificó énte'l tribunal de la Sección Tercera que la querella dirixóse a Fernández Villa y a Pedro Castillejo, ex-secretariu xeneral del Infide, dependiente del Soma, "por ser los que teníen un patrón definíu d'actuación, sistemáticu", y yeren, de mano, "los máximos responsables".

Postigo reconoz que "se compensó" a Villa por dexar de ser senador

L'ex-presidente del Montepío José Antonio Postigo aseguró qu'hebo una xunta con "cuatro o cinco compañeros" na que s'alcordó que se siguiría abonando al ex-secretariu xeneral del SOMA José Ángel Fernández Villa'l pagu del coche Mitsubishi, anque taba liquidada dafechu la so compra, "pa compensalu de dalguna manera" énte la perda económica que suponía dexar de ser senador socialista.

Al traviés d'una videoconferencia, fecha dende Murcia, Postigo esplicó que "fai siete o ocho años", xestionó la compra d'un Mitsubishi pal so "compañeru y amigu Fernández Villa" pola so intervención quirúrxica nel llombu y cola so minusvalía "aforrábase" el tema de "la fiscalidá y pagábalu "el sindicatu".

"A toos y caunu de los miembros de la comisión executiva pagábense-yos gastos", reconoció énte'l tribunal de l'Audiencia Provincial que güei volvió entamar el xuiciu escontra Villa pola so presunta autoría nun delitu siguíu d'apropiación indebida.

"Nin Villa, nin tampoco'l secretariu d'alministración, qu'hebo munchos, ente ellos José Luis Alperi -actual secretariu xeneral del SOMA- consentíen los gastos. Tenía qu'articulase un mecanismu d'un estadillu onde se ponía kilometraxe, comida y incorporábense los tiques de peaxes y había que xustificalos", esplicó.

"Él -n'alusión a Villa- mercaba llibros y taben a disposición de toos pa lleelos y tolos que queríen lleelos podíen facelo, yeren de temes sindicales, políticos y hestóricos; nun yeren de noveles del oeste", conseñó Postigo na so declaración.

Postigo reconoció que "hebo problemes" pa l'aprobación de les cuentes, porque había un compañeru en Rodiezmo que nun taba d'alcuerdu na contabilidá y tamién había "problemes" porque l'ex-contable Juan Cigales tampoco taba conforme con dalguna factura d'un cursu de formación "de cárniques".

"Enxamás se punxeron en cuestión les cuentes", amestó'l testigu a entrugues de la defensa, que repitió que Cigales llevaba "hasta les cuentes personales" de Villa y "enxamás" oyó protestar a naide por esti tema.

El testigu Armando Fernández Natal, de l'antigua comisión executiva del SOMA-UXT, al traviés d'una videoconferencia dende Gerona, señaló que la disposición de les cuentes yera acomuñada con "dos persones siempres".

José Ramón Fernández Suárez, ayalgueru contador de la xunta alministradora del SOMA-UXT, aseguró güei que yeren necesaries "dos firmes" p'autorizar los gastos y que les tarxetes taben al cargu d'Amalio Fernández y el contable Juan Cigales y desconocía a quién pertenecía la tarxeta de la que disponía l'ex-secretariu xeneral del sindicatu, José Ángel Fernández Villa.

El testigu esplicó que'l coche Mitsubishi yera utilizáu "davezu" por Villa, quien yera'l que pagaba la gasolina, los gastos de comíes, y los tiques "supón" que los pasaba a Juan Cigales que darréu esbillábalos enantes d'entamar el so pagu.

El testigu esplicó que les cuentes nun s'aprobaron por unanimidá y que Fernández Villa comentó-y que podíen faer una auditoría, pero l'ex secretariu xeneral del Soma "tampoco quería aprobar les cuentes polo de l'auditoría".

"Villa nun participaba nes xuntes, anque desconozo por qué apaez la so firma nes actes", ratificó José Ramón Fernández.

El xuiciu va siguir el próximu llunes, día 23, a les 10 de la mañana, na Audiencia Provincial.