El Sipla esixe acelerar la negociación del conveniu de la Policía Local de Xixón

Los axentes nun fadrán más hores estres pa reforzar la seguridá n'eventos pel branu

El Sipla reconoz un medrante descontentu polos retrasos na robla del nuevu conveniu de la Policía Local de Xixón. Dempués de tres xuntes cancelaes en xunu, mesmu mes marcáu p’algamar un alcuerdu definitivu, y dempués de cinco años col conveniu prorrogáu, el Sipla esixe acelerar la negociación.

Énte esta situación, el sindicatu policial fizo un llamamientu a la plantiya pa nun facer más hores estres que sirvan pa reforzar la so presencia nos eventos pel branu.

Decisión con un impactu mínimu, apunten dende’l Consistoriu. Los axentes maticen el carís de la presunta fuelga de 'bolis cayíos' a la hora d’imponer infracciones.

L’Ayuntamientu de Xixón nun quixo valorar l’estáu de la negociación, más allá de reiterar la so voluntá d’algamar un alcuerdu.