El Vital Aza, un cine-teatru inauguráu a finales de los años 20 del sieglu pasáu en Pravia

Un exemplu d'arquitectura rexonalista diseñáu por Francisco Casariego

En setiembre de 1929, el cine-teatru Vital Aza xubía'l telón. Pravia sumábase asina al restu de llugares del Principáu que podíen esfrutar del séptimu arte. Los primeros propietarios fueron Telesforo Palacios y Adolfo Menéndez.

El Vital Aza ye un exemplu claru d'arquitectura rexonalista, anque tendente a la depuración racional. La so planta ye rectangular, con doble altor na so mayor parte y un tercer pisu parcial. Francisco Casariego foi l'arquiteutu que s'encargó del so diseñu.

La elección del so nome, Vital Aza, corrió al cargu de los vecinos, gracies a una iniciativa del periódicu comarcal El Sol de Pravia. L'escoyíu foi l'autor de “La Praviana”.

Dende'l puntu de vista del ociu y la cultura, Pravia aterrizó nel sieglu XX gracies a esti cine, que yera más o menos algamadizu pa les distintes clases sociales.

Sicasí, y siguiendo a otros cines asturianos, a principios d'esti sieglu, los propietarios del Vital Aza decidieron echar el zarru.

Entá caltien les vitrines nes que s'anunciaben los estrenos o la taquilla. Testigos mudos que nos recuerden les hores de drama y comedia que se vivieron nesti edificiu.