El campu vuelve a salir a la cai en defensa del sector

El Puertu Payares foi cortáu polos manifestantes media hora

Los profesionales del campu volvieron a llevar les sos reivindicaciones a la cai. Esta vegada nuna protesta convocada polos sindicatos agrarios Asaja, COAG y UCA en dellos puntos d’Asturies y que tuvo una rempuesta más llendada que la de va unos díes, anque la carretera N-630, d’El Puertu Payares, foi cortada polos manifestantes media hora.

La movilización, que se replicó en tola fastera Cantábrica, tuvo un impactu menor a la convocada’l 8 de febreru pasáu por URA y Usaga, qu’axuntó a cientos de ganaderos nuna tensa protesta nel centru d’Uviéu, que quedó cortáu polos tractores más de venticuatro hores.

Esti martes, mediu centenar d’agricultores y ganaderos movilizáronse dende mediudía énte la Delegación del Gobiernu, n’Uviéu, onde los representantes sindicales treslladaron a Delia Losa les sos principales reivindicaciones.

Na cai Santa Susana, de la capital asturiana, seis tractores y otros tres vehículos concentráronse pa reivindicar precios xustos pa los productores, la mengua de les esixencies burocrátiques y que la Política Agraria Común atienda les particularidaes de la fastera Cantábrica.