El ciclu de cine Radar foi'l primer afectáu pol retrasu presupuestariu nel Ayuntamientu d'Uviéu

Les cuentes de Cultura pa 2024 afiten una mengua d'unos 800.000 euros pa esti tipu d'actividaes

El ciclu de cine Radar foi’l primer afectáu pol retrasu presupuestariu nel Ayuntamientu d’Uviéu. La programación tendría qu’entamar esti mes de xineru. La Conceyalía de Cultura garantiza la so puesta en marcha más alantre.

Les cuentes de Cultura pa 2024 afiten una mengua d’unos 800.000 euros pa esti tipu d’actividaes, ente les que s’inxerta SACU, la Selmana del Audiovisual, y Cine a la lluz de la Lluna.

Los sos entamadores afirmen que yá tán trabayando na programación a la espera del preste presupuestariu. Dende la oposición, PSOE y IX critiquen los recortes nesti área.

Vox, per parte de so, pide recuperar partíes destinaes a otru tipu d’actividaes, como la tauromaquia.

La 'Muestra de Cine Social' (Musoc) y Parees, el festival de muralismu, fueron dos de les actividaes que se recortaron de la programación de 2023. Cultura asegura que la so idea ye entamar los trámites pa recuperales esti añu.