El códigu morse, un llinguaxe qu’entovía vive

Michel sigue usándolu en conexón cola so Bruxeles natal

Ta prácticamente en desusu pero nel so día supunxo una revolución na historia de les comunicaciones. Ye’l códigu morse. Esti 2019 cúmplense 175 años dende que s’entamare a usar esti tipu de llinguaxe binariu a base de puntos y rayes, permitiendo que per primer vegada los seres humanos pudieren comunicase a llarga distancia.

Enagora namái dalgunos nostálxicos siguen usándolu. Dalgunos d’ellos, tán na Xunión de Radioaficionaos de Xixón.

Michel deprendió’l códigu morse faciendo "la mili". Belga de nacencia, mierense d’adopción, güei ponse en contactu cola so Bruxeles natal al traviés del morse, el mediu más puru de comunicación, asegura.

La Xunión de Radioaficionaos de Xixón convirtióse nun pequeñu muséu. Equí puen vese manipuladores con muncha historia, dende los usaos por bombarderos na II Guerra Mundial, hasta modelos asemeyaos a los que s’usaron nel malográu Titanic. Una afición que s’esparde per tol mundu.

Agora hai qu’entrugar, si tien sentíu’l morse na era dixital.