El confinamientu de la población ayuda a meyorar la calidá del aire

Los datos de les estaciones del Principáu constaten un descensu de les partícules en suspensión

El confinamientu de la población y la baxa actividá ta ayudando a meyorar l'aire qu'alendamos los asturianos. Los datos de les estaciones de midida del Principáu y les del Conceyu de Xixón, constaten que la evolución del gráficu de partícules en suspensión ta siendo descendiente día ente día.

Cada día que pasa coles midíes a valir de restricción de movimientos y actividá industrial, l'aire qu'alendamos meyora en calidá, tanto de partícules en suspensión (PM-10), como en dióxidu de nitróxenu.

Si buscamos un exemplu en Xixón, la estación d'El Llauredal, una de les más significatives, amuesa que les PM-10 rexistren un llixeru descensu dende l'estáu d'alarma, con una media 10 puntos per debaxo del restu del mes. Les partícules PM 2.5 tienen un nivel mediu similar a los díes anteriores del estáu d'alarma. A too ello contribúi'l tráficu rodáu que supón, según los espertos, un 50% de les emisiones.

Nesti sen, el gobiernu local yá tien rexistros de cada día que pasa dende l'estáu d'alarma. Hai cuasi un 7% menos de coches pela ciudá que'l día anterior. Si comparamos un día d'esta selmana col mesmu de la pasada, la cifra aumenta, hasta superar el 52%.