El final del tramu La Doriga-Curniana yá ye una realidá

De la Serna inaugurará mañana una obra axudicada en 2007

L'autovía Uviéu-Salas-La Espina foi una de les actuaciones incluyíes a financiar colos fondos mineros del periodu 1998-2001. En 2007 axudicó'l tramu La Doriga-Curniana cola promesa, naquel tiempu, d'acabalu en tres años y mediu, pero la crisis económica echó p'atrás los planes iniciales.

La obra paró de manera radical hai siete años cuando taba construyida poco menos de la metá. El Ministeriu de Fomentu retomó l'actuación n'agostu de 2015 y mañana'l ministru de Fomentu, Íñigo de la Serna, dirá a Asturies a la que ye la so primer inauguración desque tomó posesión d'esa cartera.

La Doriga-Curniana ye un tramu de dos kilómetros y 300 metros que tien como estructura más singular un viaductu de 875 metros de llargu y 75 d'altura sobre'l calce del Ríu Narcea.

Cauna de les calzaes tendrá dos carriles de tres metros y mediu. El nuevu vial inclúi la construcción del enllaz de Curniana, mui demandáu polos vecinos de la zona, per onde l'autovía Uviéu-La Espina conectará cola antigua Nacional 634 mediante un ramal de 820 metros de llargu.

Espérase que per esti tramu circulen cada día ente 4.000 y 8.000 vehículos.

La visita del ministru fai esperar novedaes sobre'l tramu allegáu de l'autovía, ente Curniana y Salas, que ta paralizáu dende 2010. En marzu de 2012 entró en serviciu la primer calzada ente Salas y La Espina y el Ministeriu espera llicitar en nada'l proyectu pa completar la segunda calzada de l'autovía ente Salas y el viaductu d'El Regueirón, en La Espina.