El grupu ecoloxista Mavea asegura qu'hai insectos que desapaecieron n'Asturies

Nel día mundial de les aves migratories celebraron alcuentros didácticos na charca de Zeluán

La contaminación, los pesticíes nos campos y el cambéu climáticu ta causando la desapaición de los insectos nos llugares de cría de les aves y a lo llargo de les sos rutes de migración amenaciando la so supervivencia, yá que son la base de la so alimentación, y el so llabor crucial na polinización y el control de plagues señala César Álvarez, biólogu cofundador de Mavea.

Anguaño hai una decena d'especies que faen parada nel so viaxe hacia'l norte na charca de Zeluán apunta David Díaz, biólogu de Mavea. Na xornada didáctica de güei hebo una trentena de participantes como José Luis López, Mónica Álvarez y Alejandro Álvarez.

Dende va dos décades Mavea vien anillando aves, lo que los dexa clasificales y conocer les sos rutes migratories. Cada añu unes 25.000 aves pasen pela charca de Zeluán.