El mosquitu xaponés yá ta n'Asturies y el tigre avérase per Euskadi

La plataforma Mosquito Alert identificó esta especie invasora en dellos conceyos del Principáu

El mosquitu Aedes Japonicus ta allugáu n'Asturies y tien presencia en Cantabria y el País Vascu. Confírmalo la plataforma de ciencia ciudadana Mosquito Alert, qu'identificó ocho mosquitos d'esta especie invasora en cinco conceyos; y ye probable que tea presente n'otros seis.

El fechu de que prefieren zones de viesca, mamíferos de gran tamañu y que tengan poca capacidá de tresmitir enfermedaes fai improbable, según espertos, una epidemia n'Asturies.

El descubridor del primer exemplar d'Aedes Japonicus atopáu nel nuestru país foi Jorge Chachero, un divulgador científicu, a quien-y llamó l'atención qu'un mosquitu intentare picalu en casa a plena lluz del día. Capturólu y unvió la semeya a la páxina de ciencia ciudadana Mosquito Alert.

Tres años depués, esta plataforma que combina trabayu de campu d'especialistes y collaboración ciudadana, demostró que l'Aedes Japonicus ta asitiáu n'Asturies con ocho rexistros confirmaos en cinco conceyos diferentes, la mayoría nel área central; y otros 12 avistamientos probables en otros seis conceyos; y evidencies de la so presencia en comunidaes vecines del Cantábricu.

En llaboratoriu demostróse la capacidá d'esti mosquitu pa tresmitir enfermedaes tropicales como'l virus del Nilu Occidental. Sicasí, diz esti espertu, nunca se llegó a demostrar na vida real que seya'l responsable de la so tresmisión.

Sí alvierte del peligru del mosquitu tigre, rápidu, agresivu, con hábitat urbanu, a diferencia del Japonicus, y un mayor poder de tresmisión d'enfermedaes. La so presencia yá se detectó nel País Vascu.