El paru xube n'Asturies en 2.269 persones en setiembre

La cifra de paraos na rexón ta en 70.562 persones

El númberu de paraos rexistraos nos servicios públicos d'empléu n'Asturies xubió en setiembre en 2.269 persones al respective d'agostu, el 3,32 por cientu, la cuarta mayor xuba en tasa interañal ente les comunidaes autónomes, hasta un total de 70.562 paraos.

Según los datos asoleyaos güei pol Ministeriu de Trabayu, Migraciones y Seguridá Social, en rellación a setiembre de 2017 el paru rexistráu nel Principáu baxa en 5.509 persones, el 7,24 por cientu, el séptimu mayor descensu del país.

La construcción foi l'únicu sector que rexistró un amenorgamientu del paru, de 97 persones, hasta 5.975.

Sicasí, nos servicios xubió en 2.009 persones, hasta 50.382; na agricultura, en 76, hasta 1.344, y na industria, en 65, hasta 5.737.

Amás, ente'l colectivu ensin empléu anterior tamién xubió, en 216 persones, hasta 7.124.

L'aumentu del paru afectó más a les muyeres, con 1.436 nueves paraes, hasta 40.145, qu'a los homes, onde xubió en 833, hasta 30.417.

Ente'l colectivu estranxeru, el paru xubió en 249 persones al respective d'agostu, el 5 por cientu, anque nos postreros dolce meses baxa en 222, el 4,1 por cientu.

Al respective de la contratación, en setiembre robláronse n'Asturies 31.252 contratos, un 1,8 por cientu menos que n'agostu y un 0,2 por cientu menos que va un añu, y de los que 28.165 fueron temporales y 3.087, indefiníos.

Los datos del Ministeriu reflexen un aumentu significativu de la contratación indefinida, del 17,7 por cientu mensual y un 31,8 por cientu interañal, mientres que'l temporal baxa un 3,5 por cientu al respective d'agostu y un 2,8 por cientu en rellación a setiembre de 2017.

Sicasí, de los 278.417 contratos roblaos nel Principáu ente xineru y setiembre, el 91,18 por cientu yera de calter temporal y el 8,82 por cientu restante, temporal.

Nel conxuntu del país, el númberu de paraos rexistraos nes oficines de los Servicios Públicos d'Empléu Estatal (SEPE) algamó los 3.202.509 persones'aumentando en setiembre en 20.441 persones respecto al mes anterior (+0,63%), la cifra más baxa contabilizada nun novenu mes del añu dende 2014.