El presuntu responsable del homicidiu de David Carragal pasa la so primer nueche en prisión

Jorge Cue sedrá deriváu güei a una de les Unidaes Terapeútiques

El presuntu responsable del homicidiu de David Carragal pasó la so primer nueche en prisión. Dempués de los preceptivos reconocimientos médicos, sedrá treslladáu a unu de los módulos de la UTE que tien la cárcel asturiana.

El mozu, de 18 años, ta pendiente de valoración pa ver si lu inxerten o non nel protocolu de prevención de suicidios, lo que supondría, ente otres coses, tar acompañáu por un internu de confianza.

Enagora, yá lu vio’l médicu. Esta mañana tuvo la entrevista col educador, el trabayador social y el psicólogu. Del resultáu d’eses entrevistes, dependerá que lu inxerten o non nel programa de prevención.

Dempués de pasar la so primer nueche nel módulu d’ingresos, güei sedrá deriváu a una de les Unidaes Terapeútiques, a una de les UTES, coles que cuenta la prisión.

El so abogáu pensaba averase esta mañana hasta la cárcel pa tener un alcuentru con él.

A la Policía, entovía, nun llegaron más testimonios o documentos gráficos sobre l’agresión, dempués de la llamada que facíen ayeri a la collaboración ciudadana.

En recuerdu de la víctima, un colectivu ciudadanu pide qu’enantes de les oposiciones d’Educación del sábadu viniente se guarde un minutu de silenciu. Silenciu en recuerdu al profesor fináu, que tendría qu’examinase esi día. Quieren qu’esi xestu valga tamién pa reivindicar una meyor educación qu’evite qu’haya estes agresiones.