El programa 'Housing First' prevé cuntar con 30 usuarios enantes de mayu

La iniciativa pa consiguir vivienda a persones ensin llar llegó va dos años a Asturies

El programa de viviendes pa persones ensin llar 'Housing First' prevé cuntar enantes de mayu con 30 usuarios. La iniciativa, impulsada pola dirección xeneral de Vivienda, surdió nos años 90 en Norteamérica y llegó a Asturies va dos años.

Anguaño, 25 persones beneficiáronse d'esti programa y tán repartíes en pisos d'Uviéu, Xixón, Avilés y El Franco.

Unu d'estos residentes ye Jorge Fuillerat, quien va tres meses cambió a unu d'estos inmuebles que comparte con 'Water', un gatu más bien fuxidizu. Gustáron-y les vistes y la tranquilidá de la zona. Enantes, vivía na cai, una esperiencia cola que nun cuntaba y que-y resultó devastadora.

Casáu, con dos fíos y con trabayu, el so divorciu inxertólu nun pozu. Desplica que salir de la cai ye difícil porque cuando nun tienes nada la prioridá ye salvar el día. Perdió la noción del tiempu y pasó ocho años al rasu. Un alcuentru casual cambiólo too.

Entamó entós un procesu de desintoxicación y entró en contactu cola Fundación Rais que lu escoyó pal so proyectu de vivienda. Visítenlu polo menos una vegada a la selmana pa ver cómo evoluciona. La clave del programa ye l'enfotu.