El proyectu pa fabricar componentes de bateríes n'El Musel empecipia'l so trámite ambiental

La iniciativa quier movilizar cerca de 600 millones d'euros nuna primer fase d'inversión

El proyectu d'inversión plantegáu pola empresa Ionway pa la instalación d'una planta de fabricación de componentes pa bateríes de vehículos eléctricos nel cai d'El Musel, en Xixón, entamó güei'l procesu d'información pública cola so espublización nel Boletín Oficial del Principáu (BOPA).

Entama asina la tramitación medioambiental d'una iniciativa que quier movilizar cerca de 600 millones d'euros nuna primer fase d'inversión pero que, según la conseyera de Transición Ecolóxica, Industria y Desenvolvimientu Económicu, Nieves Roqueñí, nun supón que la inversión tea yá aprobada.

Cola espublización de los detalles del proyectu y la inversión prevista nel Bopa de güei ábrese la fase d'información pública nos procedimientos d'autorización ambiental integrada y d'evaluación d'impactu ambiental, que se va estender per un mes.

El proyectu foi presentáu por Ionway, empresa constituyida pola multinacional belga Umicore y por PowerCo, filial de l'alemana Volkswagen, como alianza industrial pa suministrar bateríes a los vehículos eléctricos del xigante automovilísticu.