El rei pasa revista naval con miles de persones en Xixón pel Día de les Fuerces Armaes

Desfile aereu nun despliegue nel que participaron más de 2.000 efectivos

El rei Felipe VI presidió esti vienres en La Playa San Llorienzo de Xixón una revista naval, una exhibición dinámica y un desfile aereu nun despliegue nel que participaron más de 2.000 efectivos y qu’axuntó a miles de persones, por mor del Día de les Fuerces Armaes. El so actu central desendolcaráse mañana, sábadu, n’Uviéu.

El monarca entamó a pasar revista sobre les 15:25 hores dende’l patrulleru d’altura 'Atalaya', onde tuvo acompañáu pola ministra de Defensa, Margarita Robles, ente otres autoridaes.

La revista naval cuntó cola participación de siete buques de l’Armada y una embarcación de la Guardia Civil y tuvo encabezada pol portaaeronaves 'Juan Carlos I', buque insignia de la flota, de 231 metros d’eslora.

Tamién formaron parte les fragates 'Blas de Lezo' y 'Santa María', el buque d’asaltu anfibiu 'Galicia', el buque de cooperación pesquera 'Intermares', los cazamines 'Tambre' y 'Tajo' y la patrullera de la Guardia Civil 'Luna'.

Dempués de ser testigu de les maniobres navales, Felipe VI foi recibíu al rodiu de les 16:30 hores ente abondos aplausos y vítores nel paséu de La Playa San Llorienzo, onde tuvo acompañáu d’autoridaes, ente elles el xefe d’Estáu Mayor de la Defensa, Teorodo López Calderón, y el presidente del Principáu, Adrián Barbón, y nel que miles de persones esfrutaron d’una exhibición dinámica que se desendolcó na sablera xixonesa.

El monarca presenció una demostración de la Patrulla Acrobática de Paracaidismu del Exércitu del Aire y un desembarcu anfibiu con medios navales y aéreos.

Los asistentes aplaudieron sobre manera la pasada sele sobre la costa xixonesa de dellos Harrier AV-8 y un vuelu estacionariu d’ún d’ellos, asina como un exerciciu de persecución y prindamientu énte una amenaza terrorista na costa fechu por miembros de la Unidá Especial d’Intervención (UEI) de la Guardia Civil.

Una demostración acrobática d’un helicópteru Tigre y otra aeronave de maniobra del Exércitu de Tierra zarró esta parte de los actos, dempués de los qu’entamó un desfile aereu, que, ente caces, vehículos de tresporte, aviones d’enseñanza, de llucha escontra’l fueu y helicópteros movilizó alredor de setenta aeronaves.

El broche d’oru púnxolu la Patrulla Águila, que nunos minutos surcó’l cielu de la ciudá y pintó nel aire los colores de la bandera d’España.