El tribunal decide mañana si Fernández Villa ta capacitáu pa declarar

La defensa de Villa pide la suspensión del xuiciu pol so estáu mental

L’Audiencia Provincial d’Uviéu decidirá mañana sobre la capacidá del ex-líder sindical mineru José Ángel Fernández Villa pa declarar nel xuiciu qu’entamó güei pola so presunta autoría nun delitu siguíu d’apropiación indebida de los fondos del SOMA-UXT.

El tribunal de la Sección Tercera de l’Audiencia decidirá si la pericial de los forenses y neurólogos qu’esaminaron al ex-secretariu xeneral del SOMA-UXT vien a confirmar la tesis de la defensa de la so imposibilidá d’atender y comprender con coherencia a les cuestiones que puean plantegar les partes y, poro, inhabilítenlu pa declarar, como pide l’abogada defensora, Ana García Boto.

Pela cueta, les acusaciones consideren que’l que fuere secretariu xeneral del SOMA-UXT 35 años ta en condiciones de declarar.

La defensa pidió güei la suspensión de la vista oral escontra’l so representáu amparada nos informes forenses que, según asegura, sofiten la so tesis de que la enfermedá mental sobrevenida y la so falta de memoria nun-y dexen declarar con toles garantíes procesales.

Igualmente, la presidenta del tribunal, María Luisa Barrio, dará anuncia mañana de si atiende tamién a la solicitú de la defensa pa que Fernández Villa, nel casu de que tenga que declarar, puea retrasar el so testimoniu previstu de mano pa mañana hasta’l 5 de xunetu viniente, fecha prevista pa la conclusión de la vista oral.