El xuiciu "mediáticu" escontra José Ángel Fernández Villa

El Principáu habilitará los medios necesarios pa ufiertar señal en directo a la prensa

Entá nun hai fecha cerrada pal xuiciu escontra l'ex-líder sindical. José Angel Fernández Villa enfréntase a cinco años de cárcel por apropiación indebida na causa abierta pol SOMA. Baráxase'l primer semestre de 2018 pa la vista oral.

Ante la repercusión mediática, l'Audiencia yá treslladó al Principáu l'envís d'allugar una sala específica pa los medios, pa que puean tener señal en directo de lo que pase dientro de la sala pa poder treslladalo a la ciudadanía.

La dirección de Xusticia tamién reforzó'l xulgáu qu'instruye la operación Hulla, otra de les causes que tien abiertes Fernández Villa. Nesti casu, el Principáu autorizó l'ampliación de la xornada pa tres funcionarios, ante el gran volume de trabayu.

Asemeyáu al Casu Renedo

El próximu vienres conoceráse la sentencia del Casu Renedo. Nella tendrá que determinase si, como denuncia la Fiscalía, esistió una trama de corrupción pa l'axudicación de contratos públicos na alministración del Principáu.

El que fuera conseyeru d'educación, José Luis Iglesias Riopedre, enfréntase a diez años y mediu de prisión y la que fuera la so directora xeneral, María Jesús Otero, a 11 años y mediu.

La Fiscalía tamién pide una pena de diez años de prisión pa la ex-funcionaria que da nome al casu, Marta Renedo, y de nueve años de cárcel, pa los empresarios d'Igrafo y Almacenes Pumarín. 13 personas sentáronse nel bancu nesta causa.