El xulgáu de Cangas reabre la investigación pol crime de Sheila Barrero

Asina figura na Memoria de la Fiscalía relativa a 2017

Según la Memoria de la Fiscalía, el casu pola muerte violenta de la moza Sheila Barrero, socedida en 2004, volvía abrise a lo llargo de 2017. Lleva, poro, dellos meses abiertu, lo qu'esplica l'impulsu que la UCO ta dando a la investigación.

Va dos selmanes, axentes de la Unidá Central Operativa de la Guardia Civil axuntáronse con Fiscalía y Tribunal Cimeru de Xusticia d'Asturies, pa informar de les actuaciones que tán llevando alantre. Sheila Barrero foi asesinada en 2004 d'un tiru na cabeza.

El xulgáu de Cangas sobreseyó provisionalmente'l casu en 2007, al entender que nun había pruebes abondes escontra'l principal acusáu, l'ex-mozu de la víctima.

La familia de Sheila Barrero recurrió énte l'Audiencia, alegando, ente otres cuestiones, que s'atoparon restos de pólvora na mano del entós acusáu.

L'Audiencia Provincial refugó'l recursu y archivó provisionalmente'l casu en 2008.

Nueve años dempués, la investigación reábrese. Too apunta a que s'apurrieron nueves pruebes pa reactivar el casu.