El xulgáu de Llanes prorroga'l secretu pol asesinatu d'Ardines

Hermetismu pa evitar posibles filtraciones

El Xulgáu de primer Instancia y Instrucción de Llanes prorrogó otra vegada'l secretu del sumariu pol asesinatu del conceyal d'Izquierda Xunida (IX) Javier Ardines, lleváu alantre'l pasáu 16 d'agostu en Belmonte de Pría, según informaron fontes de la investigación.

La titular del xulgáu decretara'l secretu de les actuaciones a finales del pasáu mes d'agostu y dende entós foi prorrogándose socesivamente, recordaron les mesmes fontes, a lo llargo de los cinco meses trescurríos dende'l crime.

La Comandancia de la Guardia Civil de Xixón y la Unidá Central Operativa (UCO) siguen avanzando nes investigaciones, nuna gran discreción y hermetismu pa evitar posibles filtraciones sobre les principales llinies de trabayu.

Javier Ardines, de 52 años y padre de dos fíos, foi asesináu a escasos metros de la so casa, en Belmonte de Pría, cuando se dirixía al puertu de Llanes, sobro les 06:00 hores del 16 d'agostu de 2018, pa dir trabayar a bordu de la so embarcación, 'Bramadoira', cola que se ganaba la vida, al arrenunciar al so sueldu de conceyal.

El conceyal foi víctima d'una emboscada al vese sorprendíu pola presencia de tres valles d'obra que la Guardia Civil cree que fueron asitiaes en metá del camín vecinal pa obligalu a baxar del vehículu pa quitales.

El calabre d'Ardines foi atopáu sobre les 08:00 hores tendíu en metá del camín rural y, a escasos metros, taba la so furgoneta col motor encendíu y la puerta del conductor abierta, lo qu'indicaba una acción antemanada y planiada, yá que díes enantes, el conceyal comentara a la so familia qu'atopara otres torgues nel camín.

El fechu de que presentara mancadures en frente, cara y nuca llevó a la investigación a sopesar que pudo haber delles persones implicaes nel crime, pero toles hipótesis sobre'l móvil y l'autoría siguen, cinco meses dempués, entá abiertes.