Enrique Fernández asegura que l’oxetivu ye caltener l’actividá d’Expal

Diz qu’anque ye una empresa privada, la so actividá ye "d’interés xeneral"

El conseyeru d’Industria, Trabayu y Promoción Económica, Enrique Fernández, solliñó esti vienres que l’oxetivu del Principáu ye caltener el trabayu y l’actividá de la fábrica d’Expal en Trubia, Uviéu, dempués de que la dirección presentare un despidu colectivu pa los sos 52 trabayadores.

En declaraciones a los periodistes nuna visita a la fábrica de Fuensanta, en Nava, Fernández dixo que la esmolición del Gobiernu nestos casos siempres ye saber qué va pasar colos trabayadores y l’actividá.