Entama la campaña de vacunación antigripal

Sanidá llama a 200.000 persones de riesgu a vacunase

La campaña de vacunación antigripal de la temporada 2017-18, qu'entamó güei en 195 puntos repartíos per tol Principáu, anima a les 200.000 persones inxertes nos grupos de riesgu a inmunizase pa prevenir les complicaciones d'esta enfermedá.

La Conseyería mercó 207.000 dosis de vacuna trivalente, con un costu de 580.944 euros, que namái tien partícules inactivaes del virus, poro, en nengún casu pue producir la enfermedá.

Ye una opción mui segura, porque malapenes produz efectos secundarios, anque pue provocar molesties nel sitiu la inyección y, en pocos casos, otros síntomes como fiebre y malestar xeneral, que desapaecen en pocu tiempu.

Esta campaña allargaráse hasta'l 31 d'avientu y el Principáu aspira a algamar una cobertura del 65% de les persones mayores de 65 años (l'añu pasáu'l porcentaxe foi del 55%) y recuperar asina cifres anteriores a la pandemia de 2010. La vacunación tamién se recomienda pa los trabayadores sanitarios cola fin de que nun tresmitan la infección.

Poro, la Dirección Xeneral de Salú Pública pide la collaboración d'estos profesionales pa que se protexan a ellos mesmos y a los ciudadanos.

En xeneral, como n'años anteriores, la campaña diríxese sobre manera a les persones que tienen un mayor riesgu de desendolcar complicaciones derivaes de la infección gripal y a les que puen tresmitir la infección a los anteriores al traviés d'un contactu davezu con ellos.

Les vacunes aplíquense de baldre y de mou descentralizáu nos centros de salú y consultorios del Sespa.

Les persones interesaes tienen que contactar col so centru sanitariu de davezu pa pidir cita previa.