Entama la so actividá'l centru de crisis pa víctimes d'agresiones sexuales d'Asturies

Va atender la emerxencia d'una agresión sexual y l'acompañamientu al llargu plazu

Entama la so actividá'l centru de crisis pa víctimes d'agresiones sexuales d'Asturies. A partir del 25 de payares va entamar  a dar serviciu ufiertando atención les 24 hores los 365 díes al añu, tanto p'atender la emerxencia d'una agresión sexual, como pal acompañamientu al llargu plazu.

Una coordinadora, seis abogaes y seis psicólogues van atender dende Uviéu a tolos casos. Dende l'atención inmediata a les víctimes d'agresiones sexuales, hasta l'acompañamientu nel procesu al llargu plazu, pa faer frente a les dificultaes que carecen les víctimes tres sufrir una agresión.

El centru va trabayar en collaboración colos 16 Centros Asesores de la Muyer y cola Rede de Cases d'Acoyida d'Asturies pa garantizar una alternativa habitacional nes situaciones que la necesiten.

Les muyeres víctimes d'agresiones van poder dir al centru ensin necesidá de poner primeramente una denuncia. Les víctimes van tener númberos d'atención específicos con serviciu de llamaes y WhatsApp y la opción de contactar per redes sociales y dende los teléfonos 016 ó 112.