Esmolición pola situación de los ríos asturianos

Desbordamientos en Salinas y Avilés

N'El Ríu Raices, en Salinas, el calce algamó los 2,20 metros y ta en situación de prealerta.

Nesti llugar sufrieron les consecuencies del temporal y alborecíen con cais, garaxes y hasta viviendes inundaes dafechu. N'Avilés tamién hubo incidencies, con dalgunes cais inundaes, sobre manera, nel barriu de Versalles o Llaranes.

El Ríu Narcea al so pasu per Quinzanas, en Pravia, ta en situación d'alerta al algamar una altura de 2,90 metros, anque nes últimes hores amuesa una tendencia a la baxa, informa la Confederación Hidrográfica del Cantábricu.

A les 9:30 taba tamién en situación de prealerta El Ríu Noreña al so pasu per La Fresneda, en Siero, onde'l ríu algamare un nivel de 3,31 metros, y el Nalón a l'altura de Grullos en Candamu, onde presentaba un nivel de 5,15 metros y siguía xubiendo.

Dalgunos tramos del Caudal, Nalón, Nora, Eo, Esva, Narcea, Pigüeña, na metá occidental, y del Seya, Piloña y Llinares, na vertiene oriental tamién taben siendo oxetu de siguimientu dende la CHC por riesgu de desbordamientos.

Una inundación tien cortada dende la nueche del llunes la carretera GO-12, ente Iboya y Ambiedes nel conceyu de Gozón, informa'l 112 Asturies.