Facienda prevé 516.515 declaraciones n’Asturies

Prevé devolver 264 millones d’euros y ingresar 175 millones

La delegación de l’Axencia Tributaria n’Asturies prevé la presentación de 516.515 declaraciones de la renta na campaña de 2017 y devolver 264 millones d’euros.

El delegáu especial de l’Axencia Tributaria n’Asturies, José Ignacio Rollán, presentó en rueda de prensa los datos de la campaña de la renta nel Principáu, qu’arrancó’l miércoles y que s’esparde hasta’l 2 de xunetu.

Según previsiones de l’Axencia Tributaria, esti añu n’Asturies presentaránse 516.515 declaraciones de la renta, un 1,10% más que les 510.895 de la campaña de 2016.

D’elles, 431.290 sedrán individuales, un 2% más que l’añu pasáu, y 85.225 a comuña, con una cayida d’un 3,4% al respective de les de 2016.

Del total de declaraciones, 362.760 saldrán a devolver, con una baxada de un 2% al respective del añu pasáu, mientres que 131.323 tendrán saldu positivu, con una xuba del ocho por cientu, y 22.432 sedrán negatives.

La campaña de la renta tendrá un saldu negativu de 89 millones pa la delegación asturiana de l’Axencia Tributaria, que prevé devolver 264 millones d’euros y ingresar 175 millones.

Esti añu hai una cayida d’un 5,3% nes devoluciones y una xuba del 4,9% nes cantidaes a ingresar a Facienda.