Fame Poétika enllena los chigres de poesía

De les sos timbes yá salieron dos antoloxíes d'autores nacíos mayoritariamente nos 90

El colectivu asturianu Fame Poétika cumple'l quintu aniversariu y coles sos timbes en chigres llograron que decenes de persones tengan munches ganes de poesía.

Micro abiertu a quien quiera recitar y d'acompañamientu artistes locales o pinchaes de discos. Nun hai caxé, temática nin idioma obligatorios, anque munchos usen l'asturianu.

Foi Diego Solís quien entamó va cinco años con una idea importada de la Selmana Negra. Agora Fame Poétika cunta con un grupu de trabayu de siete miembros.

Presencia en redes, cameos de Nacho Vegas, Jorge Explosión o Fee Reega, un bon trabayu gráficu y el boca a boca faen que'l colectivu enllene los chigres de poesía.

De les sos timbes yá salieron dos antoloxíes d'autores nacíos mayoritariamente nos 90. Dalgunos como Diego asoleyaron el so primer poemariu.

Entamaron más de 50 alcuentros en chigres d'Uviéu, Xixón, Avilés, Mieres o Villaviciosa. Tamién fueron convidaos al Festival lliterariu Kerouac de Vigo y el próximu mes van formar parte del programa del Xixón Sound.