Fernández Villa va a los xulgaos a sometese a un esamen forense

Lleven a los xulgaos a los cuatro deteníos na Operación Hulla

L'ex-secretariu xeneral del SOMA-UXT José Ángel Fernández Villa abandonó a les 12:45 hores el Palaciu de Xusticia d'Uviéu, onde taba citáu a declarar na Operación Hulla, tres sometese a un esame del médicu forense pa determinar el so estáu de salú.

Fernández Villa, que como a la llegada nun fizo declaraciones a los medios y necesitó l'ayuda de la so muyer y de la so fía pa caminar por mor del so deterioru físicu, ta siendo investigáu en rellación al presuntu desvíu, apropiación y ocultación de fondos públicos y privaos del Montepío de la Minería y, pel momentu, nun trescendió si prestó declaración.

N'otra causa por apropiación indebida tres la querella interpuesta pol SOMA-UXT, na que yá se decretó apertura de xuiciu oral, la representación llegal de Fernández Villa presentó munchos recursos pa tratar d'evitar la so declaración ante la xuez, dalgo qu'al final tuvo que facer el pasáu marzu, catorce meses depués de ser citáu per primer vez.

Naquella ocasión, un neurólogu designáu pol xulgáu pa facer l'esamen del estáu mental del ex-líder sindical ratificó que taba en condiciones de sometese a un interrogatoriu, anque con entrugues curties y con descansos.

A lo llargo la mañana prestaron declaración nel Xulgáu otros testigos y investigaos nesta operación, ente otros trabayadores, autonómos y proveedores.

Per otru llau, los cuatro prindaos nesta operación lleváronlos dende'l cuartel d'El Rubín nun furgón a los xulgaos onde pasarán a disposición xudicial. Ente ellos, tamién ta l'ex-presidente del Montepío de la Minería, José Antonio Postigo.

A lo llargo la mañana, los axentes de la UCO siguieron recabando información nel cuartel onde tomaron testimoniu a más personas, ente elles la fía de Postigo y el que fuera responsable de los asuntos del Montepío de la Minería, Rafael Virgós.