Fernando Álvarez y Julie Reim, hospitaleros del albergue Mater Christi de Tinéu

Un uvieín y una alemana que trabayen nel llugar onde se conocieron y formaron la so familia

Anque nun entraba nos planes de Fernando Álvarez, uvieín, el volver a Tinéu, onde yá estudiare un módulu, una oportunidá llaboral llevólu otra vuelta a esti conceyu del suroccidente. Y a vivir mui cerca del albergue públicu de pelegrinos, onde pasaba munchos de los sos momentos llibres.

Julie Reim ye alemana. Acabare'l Camín de Santiago del Norte y viose con fuerces pa entamar el Primitivu. Al llegar al albergue de Tinéu, alcontró a Fernando. L'alcuentru ente los dos foi en mayu del añu pasáu y yá nun se volvieron a separtar. Anque tampoco entraba nos planes de Julie quedar en Tinéu.

Dende ochobre pasáu, los dos son hospitaleros del albergue onde se conocieron. Una esperiencia cola que tán encantaos.

Nesti tiempu, amás, nació la so fía Alma, qu’esti xunu cumple tres meses. Esti trabayu que-yos dexa tar xuntos y compartir tol so tiempu cola pequeña, ye pa ellos un privilexu.

Encantaos amás cola acoyida en Tinéu, enagora piensen quedar equí, anque nun descarten más alantre completar, yá como familia, el Camín Primitivu y siguir dempués col espíritu viaxeru de Julie.