Gobiernu, axentes sociales, cámares y conceyos van trabayar les directrices de comerciu

Barbón reclama diálogu con tolos axentes pa reformar les directrices de comerciu

La próxima selmana va constituyise un grupu de trabayu que ponga a puntu les directrices rexonales de comerciu y nel que van participar les conseyeríes implicaes, la Mesa de Comerciu de la Federación Asturiana d'Empresarios, los sindicatos, la Federación de Conceyos y les cámares de Comerciu.

"Vamos trabayar na reforma de les directrices de comerciu, pero non porque lo diga un alcalde, sinón porque pasaron años y hai que faer una puesta a puntu", afirmó'l presidente del Principáu, Adrián Barbón, arriendes del discutiniu abiertu ente'l rexidor de Siero, el socialista Ángel García, y l'Executivu autonómicu énte los planes de la multinacional Costco pa instalase nesti conceyu.

L'alcalde de Siero teme que se pierda una inversión d'unos 40 millones d'euros y que podría suponer la creación de 200 puestos de trabayu pol retrasu de l'alministración asturiana na adecuación de les directrices que rixen l'apertura de grandes superficies comerciales.