Grandas de Salime defende'l proyectu de caltenimientu pal Castru del Chao Samartín

Eustaquio Revilla asegura que nun hai intención de crear un nuevu centru d'interpretación

El Conceyu de Grandas de Salime defende'l proyectu de caltenimientu que ficieron pal Castru del Chao Samartín. Enagora tramítase inxertar esta actuación dientro de los fondos del Ministeriu de Fomentu, anque l'Asociación de Conservadores y Restauradores pide que se refugue al considerala un atentáu escontra'l patrimoniu.

Dos años lleven en Grandas de Salime esperando pol entamu del ambiciosu proyectu d'afitamientu del so castru, el del Chao Samartín. El Ministeriu de Fomentu tramita nestos momentos inxertalu nel 1,5% cultural, lo que supondría financiar parte de los 740.000 euros que tien de costu.

El proyectu ye consideráu como un atentáu patrimonial pola Asociación de Conservadores y Restauradores. Creen que la intención ye instalar nuevos elementos nel castru y tapar fases constructives esenciales, daqué que refuga'l consistoriu.

Asegura l'alcalde Eustaquio Revilla que nun hai intención nenguna, como denuncia l'asociación, de crear un nuevu centru d'interpretación. L'actuación, diz l'alcalde grandalés, pasa namái por afitar un recintu fechu 800 años enantes de Cristu.

La Conseyería de Cultura refugó esta mañana facer declaraciones sobre les acusaciones, pero TPA Noticies tuvo accesu a un dictame redactáu va un mes pol Serviciu de Patrimoniu del Principáu en que se refuguen estes acusaciones. Esplica'l documentu que la denuncia básase en xeneralidaes y en datos suxetivos ensin cuntar con pruebes técniques.