Güertos urbanos, ivernaderos y viveros d'árboles escontra la Ronda Norte
![Construcción de invernaderos para huertos urbanos en Monte Naranco](https://www.rtpa.es/fotos//22/06/20220618143517_RTPA2252699.jpg)
Proyectu medioambiental de l'Asociación El Viescu n'El Monte Naranco
Güertos urbanos, ivernaderos y viveros d'árboles escontra la Ronda Norte. Ye lo que plantega l'Asociación El Viescu. El colectivu mercó una parcela de la falda d'El Monte Naranco pola que ta prevista que pase'l trazáu de la vía rápida. Como alternativa, empezaron a dar forma nesi espaciu a un proyectu medioambiental y ecolóxicu opuestu a un proyectu que, dicen, solo va traer ruíu y contaminación.
L'Asociación El Viescu surdió a finales del añu pasáu coles mires de promover la creación d'un Aniellu Verde alredor d'Uviéu y protexer el patrimoniu natural del conceyu.
Mercaron una parcela de 3.500 metros cuadraos na falda d'El Naranco, al altor d'Ules, que yá trabayen pa da-y una ventena de güertos urbanos, ivernaderos de granes y viveros d'árboles autóctonos.
Un espaciu tamién pa la celebración de talleres y actividaes socioculturales de tou tipu en collaboración con otros colectivos.
Cola so iniciativa quieren poner un granín d'arena na llucha escontra la Ronda Norte. La so idea ye poner los güertos urbanos n'arriendu pa recaldar fondos pa mercar nueves parceles y ufiertar una alternativa más sostenible pa El Monte Naranco.