Home d'ente 30 y 60 años, l'usuariu mayoritariu de bicicleta en Xixón

La falta d'infraestructures ye'l principal problema, apunten los xixoneses

Home, d'ente 30 y 60 años qu'usa la bicicleta por ociu o pa dir al trabayu. Ye'l perfil que dibuxa la primer encuesta ellaborada pol Observatoriu Xixonés de Movilidá ente usuarios avezaos de la bicicleta.

L'estudiu recueye les respuestes d'un centenar d'usuarios. Eugenia García ye una d'elles. Usa la bici a diario pa dir trabayar y faer recaos. Echa en falta más aparcamientu pa estos vehículos en tola ciudá.

La falta d'infraestructures ye'l principal problema. Más d'un 60% considera que la ciudá tien condiciones favoratibles pal usu de la bici, pero echen en falta más y meyores carriles bici.

Por eso, piden al Conceyu qu'apueste pola bicicleta poniendo en marcha midíes que pacifiquen el tráficu y conectando ente sí la rede esistente.